|
En Ayerbe, tradizional ñudo de comunicazions entre Tierra Plana e a montaña, e eszenario d'importans mercaus agricolas e ganaders, s'alcuentra o Centro de Interpretación de Santiago Ramón y Cajal, premio Nobel de medizina, que pasó buena cosa d'a suya infanzia en ista localidat.
En a bisita a la que fue casa suya conoxeremos a suya bida asinas como a contribuzión d'él a la imbestigazión zientifica a trabiés de debuxos, fotografías, estrumental, microscopios e atros obchetos, tot ixo acompañau d'un buen numbro d'anecdotas e curiosidaz. Chunto a o riu Galligo, en o pintoresco lugar de Riglos, se levantan “los Mallos”, impresionans formazions rocosas con 300 metros de parete bertical do fa niedo una d'as más importans colonias de butre d'Europa e se i practica a escalada. Allí, o Centro d'interpretación d'alicastros Arcaz, permite a o bisitán de contemplar esparbers reyals, alicas, boletas e butres en o suyo abitat natural grazias a modernas instalazions e bidiocamaras conectadas en directo.
|