A distribuzión d'as distintas espezies bechetals, os paseyos, fuens e labercas crea zonas ecolochicas diferenziadas en as que se puede atisbar un amplo numbro d'espezies ornitolochicas (ruletas, picarazas, tordas, papirrois, miarlas, chincharanas, ferrerez, etz.) chunto a atras espezies animals.

L'azeso a o parque conta con cuantas entradas, estando-ne a prinzipal la d'a carrera Rioxa, por a que un paseyo, a la mosquera de plataners e tilleras, nos conduce dica o suyo centro. Debán de nusatros, o quiosco d'a musica, a la dreita o paseyo Ramón Acín u d'as Paxaricas, en que s'ubica l'unico molimento artistico adedicau a la papiroflexia, considerau uno d'os emblemas d'a ziudat. A la zurda, destaca a Caseta de Blancanieus chunto a o molimento a Walt Disney e en a confrontanza trobamos un estaño de nenúfars arrodiau de chardins con magnolios, tot enmarcau por un amplo conchunto de pino carrasco. En a entrada a o parque por l'abenida de Juan XXIII, chunto a la estatua d'os Reis d'Aragón, se troban o lago e os chardins d'o "solarium", do abundan as zapateras.

O parque conta con una ampla dibersidat d'espezies arborias, entre las que destacan taxos, magnolios, salzes, castañeras d'Indias, bariedaz de zipreses, moreras, alcazias, tilleras, escarroners, laurelers, zedros común e d'o Himalaya e bel exemplar d'o singular árbol ginkgo biloba, unico en a suya espezie.